«ҚазМұнайГаз» ҰК АҚ (ҚМГ) Басқарма Төрағасы Мағзұм Мырзағалиев Қызылорда облысына жұмыс сапары барысында «Қазгермұнай» БК» ЖШС-нің Ақшабұлақ кен орнындағы өндірістік нысандарын, сондай-ақ «ПетроҚазақстан Құмкөл Ресорсиз» АҚ-тың Құмкөл кен орнындағы нысандарын аралады. ҚМГ басшылығымен бірге нысандарға Қызылорда облысының әкімі Нұрлыбек Нәлібаев та барды.

М. Мырзағалиев «Зияткер кен орны» жобасы аясында Ақшабұлақта ашылған жедел басқару орталығының жұмысымен танысты. Ол көмірсутек өндірісінде процестерді тиімді басқару үшін цифрландырудың маңызды екенін атап өтті.

«Қазгермұнай» компаниясының нысандарын аралау кезінде ҚМГ Басқарма Төрағасы кәсіпорын 2022 жылдың қорытындысы бойынша қойылған барлық міндетті орындағанын атап өтті. Ол кәсіпорынның тұрақты әрі апатсыз жұмысын қамтамасыз етуді және 2023 жылға арналған өндірістік бағдарламаны орындауды тапсырды.

М. Мырзағалиев сондай-ақ «Қазгермұнай» БК» ЖШС ұжымын 2023 жылы компанияның құрылғанына 30 жыл толуына орай мерейтоймен құттықтады (1993 жылы 9 қазанда құрылған).

«Өндірістік бағдарлама толық орындалды, компания жақсы қаржылық-экономикалық көрсеткіштерге қол жеткізді, әлеуметтік тұрақтылықтың жоғары деңгейін сақтап қалды және Қазақстандағы ең тиімді мұнай өндіруші ұйымдардың қатарынан қалмай келеді», – деп атап өтті М. Мырзағалиев.

«ПетроҚазақстан Құмкөл Ресорсиз» АҚ басшылығымен кездесуде ҚМГ Басқарма Төрағасы кәсіпорын тиімділігінің жоғары деңгейін атап өтіп, компания Қызылорда облысының әлеуметтік-экономикалық даму мәселелерінде ҚМГ-нің стратегиялық маңызды серіктесі екенін айтты. Сапар барысында М. Мырзағалиев «Торғай-Петролеум» АҚ газды кешенді дайындау қондырғысының жұмысымен танысты.

«Компания басшылығы мен ұжымына жұмыс істеп тұрған қорлардың сарқылуын ескере отырып, геологиялық барлау жұмысын белсенді жүргізуді жалғастыру қажет, ұжымда әлеуметтік тұрақтылықтың жоғары деңгейін сақтап, қойылған өндірістік міндеттерді орындау, сол арқылы компанияның тұрақты қаржылық-экономикалық жағдайын қамтамасыз ету маңызды», – деді ҚМГ Басқарма Төрағасы «ПетроҚазақстан Құмкөл Ресорсиз» АҚ басшылығы мен ұжымына ұйымшылдығы мен жоғары кәсіби біліктілігі үшін алғыс білдіре отырып.

Кеңес қорытындысы бойынша М. Мырзағалиев геологиялық барлау бағытындағы жұмысты жалғастыруды, кен орындарының тұрақты және апатсыз жұмысын қамтамасыз етуді, барлық экологиялық нормаларды сақтай отырып, өндірістік бағдарламаны орындауды тапсырды. Сондай-ақ, ол қызметкерлердің еңбегі, тұрмысы мен сауығуын қамтитын әлеуметтік саясатты одан әрі жүзеге асырудың маңызын атап өтті.

«ҚазМұнайГаз» ұлттық компаниясы» АҚ туралы:

«ҚазМұнайГаз» ұлттық компаниясы» АҚ (ҚМГ) – Қазақстанның вертикалды интеграцияланған жетекші мұнай-газ компаниясы. ҚМГ көмірсутектерді барлау мен өндіруден бастап тасымалдауға, өңдеуге және мамандандырылған қызметтер көрсетуге дейінгі бүкіл өндірістік цикл бойынша активтерді басқарады. 2002 жылы құрылған Компания еліміздің мұнай-газ саласында Қазақстанның мүддесін қорғайды.

Шымкент қаласына барған жұмыс сапары аясында Қазақстан Республикасының Премьер-министрі Әлихан Смайылов «ПетроҚазақстан Ойл Продактс» ЖШС мұнай өңдеу зауытының жұмысымен танысты. «ПетроҚазақстан Ойл Продактс» ЖШС ішкі нарық үшін бензин, дизель отыны, авиакеросин, сұйытылған газ, мазут және басқа да мұнай өнімдерін шығаратын өңірдегі ірі кәсіпорындардың бірі болып табылады. Компанияның президенті Е.О. Қожабаев Премьер-министрді кәсіпорынның өндірістік қызметімен таныстырды. 

2018 жылы кәсіпорын Индустриялық-инновациялық дамыту жөніндегі мемлекеттік бағдарлама аясында масштабты жаңғырту мен қайта құрудан өтті. Бұл зауытқа автоматтандыру және цифрландыру саласында халықаралық тәжірибені енгізуге, өндірістік процестерді жетілдіруге, сондай-ақ шығарылатын өнімнің ассортиментін кеңейтіп, сапасын көтеруге мүмкіндік берді.

Әлихан Смайылов елімізде мұнай өнімдерін тұтыну жыл сайын, әсіресе егін егу және жинау жұмыстары мен жылыту маусымы кезеңдерінде артып келе жатқанын атап өтті.

«Қазіргі уақытта қажеттіліктің артып келе жатқанын ескере отырып, Шымкент мұнай өңдеу зауытының шикізат өңдеу қуатын жылына 6 млн. тоннадан 9 млн. тоннаға дейін арттыру мәселесі пысықталып жатыр. Бұл ішкі нарықты толығымен қамтамасыз ету мәселелерін шешіп қана қоймай, сондай-ақ қала тұрғындарын жұмыспен қамтамасыз етеді», — деді Үкімет басшысы.

Премьер-Министр қазіргі кезде Үкімет жанар-жағармай материалдары нарығын реформалауды, оның ішінде еліміздегі мұнай өңдеу зауыттарының барлығын маркетингтік жұмыс принципіне ауыстыруды жүргізіп жатқанын айтты. 

CNPC – сенімді серіктес

Бұған ширек ғасырдағы ынтымақтастық нәтижесі айғақ

Биыл Қазақстан мен Қытай арасындағы мұнай-газ сала­сындағы ынтымақтастық­қа 25 жыл толды. Ол 1997 жылы ең ірі қытайлық инвестор – CNPC (Қытай Ұлттық Мұнай-газ Кор­порациясы) қазақстандық нарыққа шыққан кезде басталды. Бұл – әлемдік мұнай алпауыттары көшбасшыларының үштігіне кіретін және 38 елде мұнай-газ операцияларын жүргізетін әйгілі халықаралық кешенді энер­гети­калық компания.

CNPC мен Қазақстан арасындағы ширек ғасырлық ынтымақтастық стра­тегия­лық әрі өзара тиімді саналады. Ал өзара тиімділік неде? Қытайдан келген компания Қазақстан экономикасына қандай пайда әкелді? Қытай кәсіпорындары қарапайым қазақстандықтар үшін нендей жақсылық жасады? Отандастарымыздың арасында еліміздің жер қойнауын пайдалану саласында Қытайдан келген компания бар екені жайлы сөз қозғалғанда осындай сауалдар туындап жататыны жасырын емес. Ендеше, сол сұрақтарға жауап беруге тырысайық.

Инвестициялар

Бұдан 25 жыл бұрын CNPC «Ақтөбемұнайгаз» компаниясының акцияларын сатып алды. Сол кезде инвес­торлар мұнда бірқатар түйінді мәселеге тап болды: салық, кредит пен жалақы бойынша қарыздар, логистикалық арналардан айырылғандық, ескірген және әбден тозған жабдықтар. Мұқият талдау жүргізгеннен кейін қытай­лық басқарушылар ең жаңа үлгідегі құрал-жабдықтарды сатып алды, ғылыми зерттеулерді кешенді түрде қолдану арқылы көмірсутегін өндіру көлемін арттырды. Бұған көп уақыт пен қар­жы жұмсалды. Нәтижесінде, «СНПС-Ақтөбемұнайгаз» АҚ шығынмен жұмыс іс­тейтін кәсіпорыннан ең табысты ком­паниялардың біріне айналды. Ширек ғасыр ішінде ақтөбелік жобаға құйыл­ған инвестиция сомасы 10,5 млрд доллардан асты. Бұл ретте Қазақстан Үкі­метімен жасалған келісімшарт бойынша қытайлық корпорация 4 млрд доллар инвестиция салуға тиіс болғанын айта кеткен жөн.

Бұған қоса, CNPC инвестициясының есебінен Қазақстанда жаңа зауыттар, мұнай және газ құбырлары пайда болды. Жаңа кен орындары ашылып, мұнай өңдеу зауыты жаңғыртылды. Еліміз көмірсутегі шикізатын тасымалдау мен транзиттен ақша таба бастады. Құбыр жүйесі батыс өңірлерден оңтүстік пен солтүстікке қарай мұнай айдауға, шалғай ауылдардың тұрғындарын газбен қамтамасыз етуге, шикізатты экспортқа жіберуге мүмкіндік берді.

25 жыл ішінде CNPC Қазақстанның мұнай-газ кешенін дамытуға 45 млрд доллардан астам инвестиция салып, 50 млрд доллар салық төледі.

CNPC құрылтайшысы болып отыр­ған кәсіпорындарда 30 мыңнан аса адам жұмыс істейді, оның 98 пайызы – Қазақ­стан азаматтары.

Барлау және мұнай өндіру

Бұл бағыттағы ең табысты жоба­лардың бірі – «СНПС-Ақтөбемұнайгаз» АҚ. Ол – Ақтөбе облысының индус­триялық флагманы. 25 жыл ішінде компания 150 млн тоннадан астам мұнай мен 90 млрд текше метрге жуық газ өндірді. Төленген салық сомасы 12 млрд доллардан асты.

Қытайлық инвесторлар бірқатар ірі және әлеуметтік маңызы бар жобаны қаржыландырды. Олардың ішінде Ақтөбе облысының шалғай ауылдарын газбен қамтамасыз етуге мүмкіндік берген жаңа мұнай-газ өңдеу кешені мен газ құбырының құрылы­сы бар. Инновациялық технологияларды енгізудің нәтижесінде, Қазақстан тәуелсіздік алғаннан кейінгі уақытта құрлықтағы ең ірі бірінші мұнай кен орны – бастапқы қоры 100 млн тонна бола­тын Солтүстік Трува анықталды. Компа­ния Жаңажол – Ембі темір жолының 72 ша­қы­рымын салды. Ол вахталық жұ­мыс­­керлерді тасымалдауға ғана емес, об­лыстың қажеттілігіне де пайдаланылып отыр. Компания объектілерінде 6 мыңнан астам адам жұмыс істейді.

CNPC-дің тағы бір бірлескен кәсіпорны – «Маңғыстаумұнайгаз» компаниясы Маңғыстау өңіріне кеңінен танымал. Ол өңірде өндірілетін бүкіл мұнайдың үштен бірінен астамын, ал республикадағының 8 пайызға жуығын қамтамасыз етіп, тұрақты түрде Қазақстандағы ең ірі салық төлеушілердің үштігіне кіріп отыр.

Қызылорда облысында CNPC «ПетроҚазақстан Құмкөл Ресорсиз» жобасына қатысуда. Бұл – мұнай өндіруші компания, оның қызметінің аясына геологиялық барлау, кен орындарын игеру, мұнай және газ өндіру, сондай-ақ мұнай мен мұнай өнімдерін өңдеу және өткізу кіреді.

Сондай-ақ CNPC «North Caspian Operating Company» консорциумының құрамында Қашаған теңіз кен орнын игеруге қатысу үстінде. Бұл ретте CNPC кәсіпорындары өндірілген мұ­най­дың негізгі бөлігін (шамамен 65 пайы­зын) ішкі нарыққа жеткізіп отыр. Шын­туайтында, бұл экономикалық тұрғыдан тиімді емес. Себебі экспорттық баға әлдеқайда жоғары. Мұны  мұнай-газ секторындағы шетелдік инвесторлардың ешқайсысы істемейді.

Тасымалдау

Көлік инфрақұрылымы – Қазақ­стан мен Қытайдың мұнай-газ сала­сын­дағы ынтымақтастығының аса маңыз­ды бөлігі. CNPC қазақстандық серік­тестерімен бірге Қазақстанның мұнай мен газға ішкі қажеттілігін қана­ғаттандыру және Қытайға шикізат экспорттау үшін орасан зор маңызы бар құбырлардың тұтас желісін құрды. Ынтымақтастық уақытында Қазақстан-Қытай магистральдарының желісі арқы­лы Қытайға 165 млн тонна мұнай мен 430 млрд текше метр газ экспортталды.

Бұл бағыттағы өршіл жоба – «Қазақстан-Қытай мұнай құбыры» компаниясын құру болды. Ол «Кеңқияқ-Құмкөл» және «Атасу-Алашаңқай» магистральдық мұнай құбырларын басқарады. Бұл жоба Қазақстанның батыс өңірінен Павлодар және Шымкент мұнай өңдеу зауыттарына, сондай-ақ Қытай нарығына шикізат тасымалдау жөніндегі маңызды стратегиялық міндетін шешті.

Қазақстан-Қытай газ құбыры – Қазақ­станның газ саласындағы  транзиттік әлеуетін дамытуға және табиғи газ жеткізуді әртараптандыруға бағытталған алғашқы жоба. Оның мақсаты – Қытай бағытында түрікмен және өзбек газының транзитін қамтамасыз ету, қазақстандық газды Қытайға экспорттау, сондай-ақ Қазақстанның оңтүстік өңірлерін газбен үздіксіз жабдықтау.

Бейнеу – Бозой – Шымкент газ құбыры батыстағы кен орындарын оңтүстік өңірлермен байланыстырып, оларды отандық табиғи газбен қамтамасыз етіп отыр. Ол салынғанға дейін еліміздің оңтүстігіне көгілдір отын Өзбекстаннан жеткізілетін және бағасы әлдеқайда жоғары болатын. Бұл – тәуелсіз Қазақстан тарихындағы аса ірі құбыр жобасы. Оны CNPC және «QazaqGaz» Ұлттық компаниясы бірлесіп басқарады.

– Мұндай жобалар – «QazaqGaz» бен CNPC арасындағы стратегиялық ынтымақтастық жетістігі тарихының көрінісі. Біз газ бағасын белгілеу бо­йынша жүргізіп жатқан реформалар бүкіл газ саласы үшін теңдессіз болатынына, газ саласының рентабельділігі мен мүмкіншілігін ұлғайтатынына сенімдіміз және CNPC-дің үлкен қызығушылығын көріп отырмыз, – дейді «QazaqGaz» Ұлттық компаниясының басқарма төрағасы Санжар Жәркешов.

Өңдеу және өткізу

Шымкент мұнай өңдеу зауыты 2018 жылы ауқымды жаңғыртудан өтті. Оны жүзеге асыру үшін компания акционерлері – CNPC мен «ҚазМұнайГаз» Ұлттық компаниясы екі миллиард долларға жуық инвестиция салды. Содан бері зауыт Еуро-4/Еуро-5 стандартына сай жоғары сапалы өнім шығарып, қуаттылығы жылына 6 млн тоннаға дейін ұлғайды.

«ПетроҚазақстан Ойл Продактс» ЖШС-і қайырымдылық акциясын өткізді

Тәуелсіздік күні қарсаңында «ПетроҚазақстан Ойл Продактс» ЖШС-нің өкілдері қайырымдылық акциясын өткізді. Мереке қарсаңында тұрғындарға қуаныш сыйлау мақсатында қолға алынған шара барысында, аз қамтылған отбасылардың балаларына, сондай-ақ Қарабастау тұрғын алабының еңбек ардагерлеріне азық-түлік жиынтығы таратылды.

«Біздің ұжым барлығын Тәуелсіздік күнімен құттықтайды!. Атаулы күнге байланысты «ПетроҚазақстан Ойл Продактс» басшылығы қайырымдылық акциясын өткізуге шешім қабылдады»

Шымкент мұнай өңдеу зауытының өкілдері Қарабастау тұрғын алабының тұрғындарына кезекті рет қонаққа келді. Бұл жолы да құр алақан емес, аз қамтылған отбасыдан шыққан 75 оқушы азық-түлік жиынтығын алады. Тұрғын алабының 25 еңбек ардагеріне де күнделікті тұтынатын тауарлар толтырылған себет сыйға ұсынылды. Айта кетейік, сый-себетке күріш, ұн, қант, күнбағыс майы, шай сияқты әр күнге қажетті заттар салынған.

Өрік Қайназарова, Қарабастау тұрғын алабының тұрғыны: «Зауыт басшылығы мен ұжымына үлкен рахмет, біздің тұрғын үй белсенділерімізге рахмет, ардагерлер бізді ұмытпайды. Азық-түлік артық болмайды менің көптеген немерелерім мен шөберелерім бар. Міне, олар қуанады. Шынында да, мұндай қиын уақытта адамдардың бір-біріне деген қамқорлығы өте маңызды».

Азық-түлік жиынтығы тізімге сәйкес таратылуда. Тұрғын алаптың белсенділері тізімге аса мұқтаж отбасыларды енгізген. Олар көп балалы және асыраушысынан айырылған отбасылар мен жетім балалар. Бұл қайырымдылық акциясы – Шымкент мұнай өңдеу зауытының өкілдері қолға алған бірінші шара емес. «Өткен жолы зауыт жұмысшылары балаларды мектепке жинауға көмектесті»,- дейді Қарабастау тұрғын алабының тұрғыны .

Халида Мұхамеджанова, Қарабастау тұрғын алабының тұрғыны: «Қайырымдылық акциясын ұйымдастырғандардың барлығына алғысымды білдіргім келеді. Еліміз өркендей берсін. Зауыт ұжымы үлкен жетістіктерге жетсін. Біз өз уақытымызда Тәуелсіз мемлекетіміздің экономикасын көтеру үшін тынымсыз жұмыс істедік. Қазір біздің балалар бүкіл халықтың игілігі үшін жұмыс істейді. Баршаңызға бейбіт өмір, отбасыларға амандық тілеймін».

Қарабастау тұрғын алабында 10 мыңға жуық халық тұрады. №99 мектеп-гимназияда 2127 бала оқиды, оның 505-і аз қамтылған отбасылардан.

Кеңес Сейтаев, Қарабастау тұрғын алабының тұрғыны: «Шымкент мұнай өңдеу зауытының басшылығы барлық уақытта көмектеседі. Жиі қайырымдылық акцияларын өткізеді. Жалын, Жұлдыз және Қаратөбе елді мекендерінің мектептері мен тұрғындарына демеушілік көмек көрсетеді. Бізді экскурсияға шақырады».

Қайырымдылық шарасы барысында жомарт жандармен бірге жүрген имам, «Петрокаазақстанойл Продактс» ЖШС-і өкілдері жағдайы төмен отбасыларға үнемі қолдау көрсететін жеткізді. Сауапты істің басы қасында жүрген ол, қайырымды азаматтарға тұрғындар атынан алғыс білдірді.

Президент Шымкент мұнай өңдеу зауытының өндірістік қуатымен танысты

Қасым-Жомарт Тоқаев Шымкент қаласына жұмыс сапары барысында Шымкент мұнай өңдеу зауытына барды.

Зауытты басқарушы компания – «Петро Қазақстан Ойл продактс» ЖШС-нің президенті Ерболат Қожабаев Мемлекет басшысына қайта жаңғыртудан өткен өндірістің қазіргі жұмысы туралы баяндады.

Бүгінде зауыттың жобалық қуаты жылына 6 миллион тонна мұнай өңдей алатын деңгейге жетіп, К-4, К-5 экологиялық санатындағы жанар-жағармай өндіре бастаған.

Бұдан кейін зауыт жұмысшыларымен әңгімелескен Президент өндіріс орнының стратегиялық маңызына тоқталды.

– Қазір зауыт ішкі нарықтың 40 пайызын қамтамасыз етіп отыр. Өнімнің сапасы да жақсарды. Бұл – өте ауқымды жұмыс. Осының бәрі сіздердің, яғни жұмысшылардың қажырлы еңбегінің арқасында мүмкін болып отыр, – деді Қасым-Жомарт Тоқаев.

Соңғы үш жылда зауыттың бензин өндірісі 2,1 миллион тоннаға, авиакеросин өндірісі 340 мың тоннаға, дизель отыны 1,9 миллион тоннаға дейін артқан.  Өнім толықтай ішкі нарыққа өткізіледі

Дизель отынының тапшылығы әсерінен адамдар АИ-95 жанармайының жоқтығына шағымданып жатыр. Мағзұм Мырзағалиев жанар-жағармайды елден шығару фактілерінің барын атап өтті. Егер жанар-жағармайды заңсыз шығару тоқтамаса, онда мұнай өңдеушілердің жұмысы нәтижесіз болады дейді ол.

Мағзұм Мырзағалиев, «ҚазМұнайГаз» ҰК басқарма төрағасы: “Шымкент МӨЗ-ның жұмысы тұрақты. Қазіргі уақытта өндірістік жоспарды толық орындап отыр. Жыл соңына дейін рекордтық 6 142 000 тонна көлемде мұнай өңделеді деп күтілуде. Бұл Тәуелсіз Қазақстан тарихындағы ен ең үлкен көрсеткіш. Жанар-жағар май нарығындагы күрделі жағдайға көршілес елдермен жанар-жағармай бағасының айырмашылыгы, Қазақстан Республикасында өндірілетін мұнай өнімдерінің сыртқа кетуі әсіресе, дизель отынының заңсыз тасымалы себеп болып отыр”.

Басқарма төрағасы Мағзұм Мырзағалиев Шымкент мұнай өңдеу зауытының жұмысымен танысып шыққаннан кейін, кеңейтілген жиын өткізді. Онда МӨЗ қызметкерлері жұмыстың тұрақты жүріп жатқанын, тіпті жоспарды асыра орындайтындарын мәлімдеді.

Ерболат Қожабаев, «ПетроҚазақстан Ойл Продактс» ЖШС Президенті: 

«Былтырға қарағанда 1 млн. тоннаға артып отыр мұнай өңдеу көлемі. 1 млн. 200-ден артық бензин шықты, 1 млн. 100-ден артық дизель отыны шықты. Жұмысымыз, жоспарланған жөндеу жұмыстарын ішкі нарықтағы жағдайға байланысты келесі жылдың ортасына ауыстырып отырмыз».

Мырзағалиев зауыт басшылығына «ҚазМұнайГаз» өңдеу блогымен бірлесіп мұнай өнімдерін заңсыз әкету мәселесі бойынша қажетті материалдар дайындауды тапсырды. Ал одан кейін барлық құжаттар уәкілетті мемлекеттік органдарға жіберіледі.

Қаламызда «Мектепке жол» акциясы жалғасып жатыр. Шымкент қаласының білім басқармасына қарасты № 99 мектеп-гимназиясында мектепішілік «Аялы алақан» атты қайырымдылық іс-шарасы ұйымдастырылып, балаларға қуаныш сыйлады.

Қайырымдылық акцияға Шымкент қаласы мәслихатының депутаты Қайрат Сүлейменов, «Петро Қазақстан Ойл Продакст» ЖШС-нің департамент директоры Сұлтан Әбдіқадыр, Еңбекші ауданы халықпен жұмыс жүргізу бөлімінің басшысы Сейдулла Бибишев, жанар-жағар май қауымдастығының төрағасы Қайыпбек Қамбаров, «Қарабастау» мешітінің имамы Берік Сейтаев қатысып, демеушілік етті. 

Мектеп директоры Сәулен Ысқақованың айтуынша, демеушілердің көмегімен аз қамтылған және көпбалалы отбасынан шыққан 670 оқушыға мектеп формасы мен құрал-жабдықтар үлестірілген. 

– Демеушілердің ішінен «ПетроҚазақстан Ойл Продактс» Шымкент мұнай өңдеу зауытын ерекше атап өтуге болады. Ата-аналар комитетінің 58 балаға көмек көрсету жөніндегі өтініштерін қолдап, оларға оқуға қажетті құрал-жабдықтарын алып берді. Оның алдында оқу процесінің сапасын жақсарту үшін мектебімізге интерактивті тақта, тігін машиналары, компьютерлер, аудио және видео аппаратуралар сияқты қажетті оқу жабдықтарын сатып алып берді, – деді мектеп директоры. 

Ата-аналар да демеушілерге алғыстарын жеткізді. 

– Төрт немерем осы мектепте оқиды. Бүгінгі «Петро Қазақстан Ойл Продакст компанисының игі ісіне айтар алғысым шексіз, – деді Халима Әлметова. 

Айта кетейік, «ПетроҚазақстан Ойл Продактс» компаниясы қала тұрғындарына тұрақты түрде әлеуметтік және қайырымдылық көмек көрсетіп келеді.

“ПҚҚР” АҚ-да 2022-2025 жылдарға арналған жаңа ұжымдық шартқа қол қойылды. 

Ағымдағы жылдың 10 тамызы күні «ПетроҚазақстан Құмкөл Ресорсиз» акционерлік қоғамында жұмыс беруші мен жұмыскерлер арасында үш жыл мерзімге жасалған жаңа ұжымдық шартқа қол қойылды. 

Маңызды іс-шараның модераторы – басқарма төрағасының еңбек және әкімшілік жөніндегі орынбасары Суфия Даминова болды. Маңызды құжатты жұмыс беруші тарапынан «ПетроҚазақстан Құмкөл Ресорсиз» АҚ басқарма төрағасы Чжао Сяомин және жұмыскерлердің мүдделерін білдірген «ПетроҚазақстан Құмкөл Ресорсиз» АҚ кәсіподақ комитетінің төрайымы Бақыт Мұқашева қол қойып бекітті.  

Жаңа ұжымдық шартқа қол қою «ПетроҚазақстан Құмкөл Ресорсиз» АҚ еңбек ұжымының өміріндегі маңызды оқиға саналады. Шарт жобасы қол қойылмас бұрын еңбек ұжымдарында — цехтарда, бөлімдерде кеңінен талқыланды. Екі тарап жүргізілген келіссөздердің оңайға соқпағанын мойындайды, дегенмен сындарлы диалог нәтижесінде дерлік барлық негізгі мәселелер бойынша келісімге қол жеткізілді. 

Ұжымдық шарттың жаңа редакциясында еңбек ету үшін лайықты және қауіпсіз жағдайларды қамтамасыз етуге арналған әлеуметтік саладағы негізгі ұстанымдар сақталып, жақсартылды. 

Еңбек ұжымын жаңа шартқа қол қойылуымен шын жүректен құттықтап, оны әзірлеуге қатысқандардың барлығына және әрбіріне алғысын жеткізген Чжао Сяомин өз кезегінде компания қызметінің тиімділігі ұжым ішіндегі ауызбірлікке, жұмыскерлер мен жұмыс берушілердің ынтымақтастығына байланысты екенін атап өтті. Өзара келісімге келіп, осындай маңызды құжатқа қол қойылғанға дән ризалығын білдірді.

Жаңа ұжымдық шартқа қол қоюдың маңыздылығы мен уақтылығын кәсіподақ комитетінің көшбасшысы Бақыт Мұқашева атап өтті:

«Бірлескен ауқымды жұмыс атқарылды. Жаңа ұжымдық шарт  барынша жақсы әрі терең пысықталып, айтарлықтай салмақты болып шықты. Екіжақты комиссияға сындарлы және нәтижелі жұмыс жасағаны үшін алғыс айтқым келеді. Баршаңызды жаңа ұжымдық шарттың бекітілуімен құттықтаймын.»

Сондай-ақ, мұнайшыларды «Қызылорда облыстық кәсіподақтар орталығы» аумақтық кәсіподақтар бірлестігінің төрағасы Мақсұт Нәлібаев құттықтап, жаңа ұжымдық шарттың жұмыскерлердің бойына ертеңгі күнге деген зор сенім ұялатып, нәтижесінде компанияның өндірістік қызметіне оң әсер ететінін атап өтті.  

Жұртшылықпен байланыс бөлімі